muqabil apne haqiqat ka aaina rakhna

muqābil apne haqīqat kā ā.īna rakhnā

añdherī raat meñ darvāza mat khulā rakhnā

ye soz-o-karb mujhe tajraboñ ne baḳhshā hai

jalānā sham.a to dāman se fāsla rakhnā

ḳhud apne vāste behtar jise samajhte ho

vahī sulūk mire vāste ravā rakhnā

na toḌī is liye maiñ ne sukūt kī zanjīr

abhī hai un se taḳhātub kā silsila rakhnā

naqāb kohre kī Daale hue hai har khaa.ī

durust apnī nigāhoñ kā zāviya rakhnā

fasīl-e-shahr-e-anā tak pahuñchne vaalā huuñ

isī tarah ye taġhāful kā silsila rakhnā

maiñ kar rahā huuñ mukammal hayāt kā paikar

jafā kā koī bhī pahlū na tum uThā rakhnā

muqabil apne haqiqat ka aaina rakhna

andheri raat mein darwaza mat khula rakhna

ye soz-o-karb mujhe tajrabon ne baKHsha hai

jalana shama to daman se fasla rakhna

KHud apne waste behtar jise samajhte ho

wahi suluk mere waste rawa rakhna

na toDi is liye main ne sukut ki zanjir

abhi hai un se taKHatub ka silsila rakhna

naqab kohre ki Dale hue hai har khai

durust apni nigahon ka zawiya rakhna

fasil-e-shahr-e-ana tak pahunchne wala hun

isi tarah ye taghaful ka silsila rakhna

main kar raha hun mukammal hayat ka paikar

jafa ka koi bhi pahlu na tum uTha rakhna