muqaddar ka agar maqdur hota

muqaddar kā agar maqdūr hotā

ġham-e-ulfat se kosoñ duur hotā

mizāj-e-'ishq se mā'mūr hotā

to shāyad husn bhī majbūr hotā

latāfat meñ na itnā chuur hotā

to chuTkī meñ butoñ ke nuur hotā

jo dil rakhnā tumheñ manzūr hotā

na yuuñ afsāna-e-mansūr hotā

jo zuhd hotā agar duniyā meñ lāzim

to 'uqbā kā bhī ye dastūr hotā

kashish rakhtī agar jalvoñ kī fitrat

ba-chashm-e-muntazir kyoñ tuur hotā

na hotā bandagī par koī maa.il

agar hotā junūñ bharpūr hotā

na uThtī aañkh 'ishq-e-ḳhush-nashīñ kī

na koī husn par maġhrūr hotā

jo dil ho kar tumhārā 'shād' rahtā

to nām-e-‘āshiqī kāfūr hotā

muqaddar ka agar maqdur hota

gham-e-ulfat se koson dur hota

mizaj-e-'ishq se ma'mur hota

to shayad husn bhi majbur hota

latafat mein na itna chur hota

to chuTki mein buton ke nur hota

jo dil rakhna tumhein manzur hota

na yun afsana-e-mansur hota

jo zuhd hota agar duniya mein lazim

to 'uqba ka bhi ye dastur hota

kashish rakhti agar jalwon ki fitrat

ba-chashm-e-muntazir kyon tur hota

na hota bandagi par koi mail

agar hota junun bharpur hota

na uThti aankh 'ishq-e-KHush-nashin ki

na koi husn par maghrur hota

jo dil ho kar tumhaara 'shad' rahta

to nam-e-‘ashiqi kafur hota