muraqqa pahle apna aaina-KHane mein rakh dena

muraqqa.a pahle apnā ā.ina-ḳhāne meñ rakh denā

yahī ā.īna-ḳhāna dil ke kāshāne meñ rakh denā

pas-e-murdan hamārī laash mai-ḳhāne meñ rakh denā

kisī ko uzr ho is meñ to vīrāne meñ rakh denā

sharāb-e-kaif-o-mastī dil ke paimāne meñ rakh denā

ye paimāna murattab ho to maiḳhāne meñ rakh denā

butān-e-māh-vash is ghar kī aksar sair karte haiñ

mirā dil aur jigar bhī jā ke but-ḳhāne meñ rakh denā

isī sūrat tumhārī bazm meñ mil jā.egā rasta

mirā armān-e-dil bhī apne parvāne meñ rakh denā

rahegā kaif yuuñ baaqī rahegā hosh yuuñ saaqī

ki merā qalb-e-muztar apne maiḳhāne meñ rakh denā

tumheñ dekhūñ tumhārī har adā-e-husn ko dekhūñ

surūr apnā mirī āñkhoñ ke paimāne meñ rakh denā

namāz-e-ishq paḌhnī hai butoñ ke paañv par jā kar

jo sāmān-e-vuzū hai vo sanam ḳhāne meñ rakh denā

fanā ke baad kaisā imtiyāz-e-bāġh-o-vīrāna

hameñ bastī meñ rakh denā ki vīrāne meñ rakh denā

ḳhushā-qismat suneñ vo aur qissa-ḳhvāñ se maiñ kah duuñ

ki ik TukḌā ġham-e-furqat kā afsāne meñ rakh denā

ye mai-ḳhāna ḳhudā-ḳhāna sanam-ḳhāna usī kā hai

nahīñ parvā 'umar' mujh ko kisī ḳhāne meñ rakh denā

muraqqa pahle apna aaina-KHane mein rakh dena

yahi aaina-KHana dil ke kashane mein rakh dena

pas-e-murdan hamari lash mai-KHane mein rakh dena

kisi ko uzr ho is mein to virane mein rakh dena

sharab-e-kaif-o-masti dil ke paimane mein rakh dena

ye paimana murattab ho to maiKHane mein rakh dena

butan-e-mah-wash is ghar ki aksar sair karte hain

mera dil aur jigar bhi ja ke but-KHane mein rakh dena

isi surat tumhaari bazm mein mil jaega rasta

mera arman-e-dil bhi apne parwane mein rakh dena

rahega kaif yun baqi rahega hosh yun saqi

ki mera qalb-e-muztar apne maiKHane mein rakh dena

tumhein dekhun tumhaari har ada-e-husn ko dekhun

surur apna meri aankhon ke paimane mein rakh dena

namaz-e-ishq paDhni hai buton ke panw par ja kar

jo saman-e-wuzu hai wo sanam KHane mein rakh dena

fana ke baad kaisa imtiyaz-e-bagh-o-virana

hamein basti mein rakh dena ki virane mein rakh dena

KHusha-qismat sunen wo aur qissa-KHwan se main kah dun

ki ek TukDa gham-e-furqat ka afsane mein rakh dena

ye mai-KHana KHuda-KHana sanam-KHana usi ka hai

nahin parwa 'umar' mujh ko kisi KHane mein rakh dena