murgh-e-jaan ko zulf-e-pechan jal hai

murġh-e-jāñ ko zulf-e-pechāñ jaal hai

jaal kyā ai jān-e-jāñ janjāl hai

aao hāzir sar pa.e pāmāl hai

jaan lab par bahr-e-istiqbāl hai

ḳhaak ho sarsabz tuḳhm-e-āshiqī

hai zamīñ aas āsmān ġhirbāl hai

husn yūsuf kā bikā bāzār meñ

ishq kā rā.īl ke iqbāl hai

jo mire lab par huā hasrat kā ḳhuun

vo buḳhār-e-shauq kā tabḳhāl hai

boltā hai āj-kal tuutī mirā

ġhair kī galtī vahāñ kab daal hai

fauj-e-ḳhat aatī hai ai sultān-e-husn

mulk-e-ruḳh se terā istīsāl hai

hai nikaltī baat un kī baat se

chaal vo chalte haiñ jis meñ jaal hai

kyā likhūñ vasf achchhī sūrat kā 'vaqār'

jins-e-nāqis ke liye dallāl hai

murgh-e-jaan ko zulf-e-pechan jal hai

jal kya ai jaan-e-jaan janjal hai

aao hazir sar pae pamal hai

jaan lab par bahr-e-istiqbaal hai

KHak ho sarsabz tuKHm-e-ashiqi

hai zamin aas aasman ghirbaal hai

husn yusuf ka bika bazar mein

ishq ka rail ke iqbaal hai

jo mere lab par hua hasrat ka KHun

wo buKHar-e-shauq ka tabKHal hai

bolta hai aaj-kal tuti mera

ghair ki galti wahan kab dal hai

fauj-e-KHat aati hai ai sultan-e-husn

mulk-e-ruKH se tera istisal hai

hai nikalti baat un ki baat se

chaal wo chalte hain jis mein jal hai

kya likhun wasf achchhi surat ka 'waqar'

jins-e-naqis ke liye dallal hai