murjhae hue phir gul-e-tar dekh rahi hun

murjhā.e hue phir gul-e-tar dekh rahī huuñ

nā-qadrī-e-arbāb-e-hunar dekh rahī huuñ

phir chashm-e-taġhāful se tirī hashr bapā hai

maiñ gardish-e-daurāñ kī nazar dekh rahī huuñ

mizhgāñ pe larazte hue ashkoñ ke diye haiñ

vāvasta-e-jāñ barq-o-sharar dekh rahī huuñ

kyā husn-e-basārat meñ basīrat kī kamī hai

kuchh ahl-e-nazar chāk-e-jigar dekh rahī huuñ

pindār-e-vafā tamkanat-e-hosh ḳhabar-dār

aflāk pe dhartī ke qamar dekh rahī huuñ

ab tak ye rivāyāt-e-kuhan jaag rahī haiñ

kuchh la.al-o-gohar ḳhāk-basar dekh rahī huuñ

kuchh terī nigāhoñ ne dikhāyā hai tamāsha

kuchh turfa zamāne kā asar dekh rahī huuñ

tasḳhīr-e-mah-o-mehr ke bā-vasf 'azīz' aaj

ujḌe hue ḳhāmosh nagar dekh rahī huuñ

murjhae hue phir gul-e-tar dekh rahi hun

na-qadri-e-arbab-e-hunar dekh rahi hun

phir chashm-e-taghaful se teri hashr bapa hai

main gardish-e-dauran ki nazar dekh rahi hun

mizhgan pe larazte hue ashkon ke diye hain

wawasta-e-jaan barq-o-sharar dekh rahi hun

kya husn-e-basarat mein basirat ki kami hai

kuchh ahl-e-nazar chaak-e-jigar dekh rahi hun

pindar-e-wafa tamkanat-e-hosh KHabar-dar

aflak pe dharti ke qamar dekh rahi hun

ab tak ye riwayat-e-kuhan jag rahi hain

kuchh lal-o-gohar KHak-basar dekh rahi hun

kuchh teri nigahon ne dikhaya hai tamasha

kuchh turfa zamane ka asar dekh rahi hun

tasKHir-e-mah-o-mehr ke ba-wasf 'aziz' aaj

ujDe hue KHamosh nagar dekh rahi hun