main diwana hun wo bhi diwani hai

maiñ divāna huuñ vo bhī divānī hai

'ishq kī ham ko choT khānī hai

'umr-e-rafta ko dekhne ke liye

mujh ko 'umr-e-ravāñ baḌhānī hai

zimmedārī kā bojh uTh na sakā

nā-tavānī hī nā-tavānī hai

sansanī hijr kī yuuñ phailī hai

lag rahā hai ki nauha-ḳhvānī hai

khol do qufl-e-zang-ālūda

tishnagī barsoñ kī bujhānī hai

laakh mushkil sahī magar phir bhī

zindagānī to zindagānī hai

hijr kī rātoñ kā shahanshah huuñ

tīrgī merī naukrānī hai

ranj kā raag kis ne chheḌā hai

aaj to merī aqd-ḳhvānī hai

dost haq par jo mar gayā us kī

tā-qayāmat amar kahānī hai

tiir mizhgāñ ke lag ga.e dil par

is liye jism arġhavānī hai

sar-girānī se ḳhuub lagtā hai

ki mohabbat zarar-fishānī hai

terā kirdār murtazā 'bismil'

terā kirdār jāvedānī hai

main diwana hun wo bhi diwani hai

'ishq ki hum ko choT khani hai

'umr-e-rafta ko dekhne ke liye

mujh ko 'umr-e-rawan baDhani hai

zimmedari ka bojh uTh na saka

na-tawani hi na-tawani hai

sansani hijr ki yun phaili hai

lag raha hai ki nauha-KHwani hai

khol do qufl-e-zang-aluda

tishnagi barson ki bujhani hai

lakh mushkil sahi magar phir bhi

zindagani to zindagani hai

hijr ki raaton ka shahanshah hun

tirgi meri naukrani hai

ranj ka rag kis ne chheDa hai

aaj to meri aqd-KHwani hai

dost haq par jo mar gaya us ki

ta-qayamat amar kahani hai

tir mizhgan ke lag gae dil par

is liye jism arghawani hai

sar-girani se KHub lagta hai

ki mohabbat zarar-fishani hai

tera kirdar murtaza 'bismil'

tera kirdar jawedani hai