میں دوانہ ہوں وہ بھی دوانی ہے

میں دوانہ ہوں وہ بھی دوانی ہے

عشق کی ہم کو چوٹ کھانی ہے

عمر رفتہ کو دیکھنے کے لیے

مجھ کو عمر رواں بڑھانی ہے

ذمہ داری کا بوجھ اٹھ نہ سکا

ناتوانی ہی ناتوانی ہے

سنسنی ہجر کی یوں پھیلی ہے

لگ رہا ہے کہ نوحہ خوانی ہے

کھول دو قفل زنگ آلودہ

تشنگی برسوں کی بجھانی ہے

لاکھ مشکل سہی مگر پھر بھی

زندگانی تو زندگانی ہے

ہجر کی راتوں کا شہنشہ ہوں

تیرگی میری نوکرانی ہے

رنج کا راگ کس نے چھیڑا ہے

آج تو میری عقد خوانی ہے

دوست حق پر جو مر گیا اس کی

تا قیامت امر کہانی ہے

تیر مژگاں کے لگ گئے دل پر

اس لیے جسم ارغوانی ہے

سر گرانی سے خوب لگتا ہے

کہ محبت ضرر فشانی ہے

تیرا کردار مرتضیٰ بسملؔ

تیرا کردار جاودانی ہے