مصافحے سے لکیریں کہیں گی ذات کا غم

مصافحے سے لکیریں کہیں گی ذات کا غم

کسی کے ہاتھ نہ لگ جائے میرے ہاتھ کا غم

لگا کے بھیج دیا ہم کو بات بات کا غم

یہ کائنات بڑی ہے کہ کائنات کا غم

بنا گئی ہمیں بے گھر کوئی قفس بدری

منا رہے ہیں ترے مبتلا نجات کا غم

ابھی دھمال کی مستی نہیں طبیعت میں

انڈیل شام کے ساغر میں پوری رات کا غم

شمار میں نہیں آئے مرے سوانح عمر

حیات کاٹ کے لکھنا پڑا حیات کا غم

چلیں تو ہوتی ہے دشت عرب کی دل سے خوشی

ہماری راہ میں پڑتا ہے پر فرات کا غم

میں دین عشق میں ہوں تو ہوس کی دنیا میں

یہ بے نیازی کی خوشیاں وہ خواہشات کا غم

تمام عمر کو شاہدؔ ہوا ہے دامن گیر

سہاگ رات کی بیوہ سے کائنات کا غم