musafahe se lakiren kahengi zat ka gham

musāfahe se lakīreñ kaheñgī zaat kā ġham

kisī ke haath na lag jaa.e mere haath kā ġham

lagā ke bhej diyā ham ko baat baat kā ġham

ye kā.enāt baḌī hai ki kā.enāt kā ġham

banā ga.ī hameñ be-ghar koī qafas-badarī

manā rahe haiñ tire mubtalā najāt kā ġham

abhī dhamāl kī mastī nahīñ tabī'at meñ

uñDel shaam ke sāġhar meñ puurī raat kā ġham

shumār meñ nahīñ aa.e mire savāneh-e-'umr

hayāt kaaT ke likhnā paḌā hayāt kā ġham

chaleñ to hotī hai dasht-e-'arab kī dil se ḳhushī

hamārī raah meñ paḌtā hai par furāt kā ġham

maiñ dīn-e-‘ishq meñ huuñ tū havas kī duniyā meñ

ye be-niyāzī kī ḳhushiyāñ vo ḳhvāhishāt kā ġham

tamām 'umr ko 'shāhid' huā hai dāman-gīr

suhāg-rāt kī beva se kā.enāt kā ġham

musafahe se lakiren kahengi zat ka gham

kisi ke hath na lag jae mere hath ka gham

laga ke bhej diya hum ko baat baat ka gham

ye kaenat baDi hai ki kaenat ka gham

bana gai hamein be-ghar koi qafas-badari

mana rahe hain tere mubtala najat ka gham

abhi dhamal ki masti nahin tabi'at mein

unDel sham ke saghar mein puri raat ka gham

shumar mein nahin aae mere sawaneh-e-'umr

hayat kaT ke likhna paDa hayat ka gham

chalen to hoti hai dasht-e-'arab ki dil se KHushi

hamari rah mein paDta hai par furaat ka gham

main din-e-‘ishq mein hun tu hawas ki duniya mein

ye be-niyazi ki KHushiyan wo KHwahishat ka gham

tamam 'umr ko 'shahid' hua hai daman-gir

suhag-raat ki bewa se kaenat ka gham