مسافر ہوں مگر کیا زندگی پر حکمرانی ہے

مسافر ہوں مگر کیا زندگی پر حکمرانی ہے

ٹھہر جاؤں تو باقی ہے گزر جاؤں تو فانی ہے

محبت میری رگ رگ میں شراب ارغوانی ہے

کہاں کا نشۂ مے میرا نشہ جاودانی ہے

جوانی آئی جاں آئی غم آیا موت آئی ہے

ابھی کیا جائیے کس کس سے طاقت آزمائی ہے

غلط پڑتی ہیں درد و غم کی بھٹکائی ہوئی نظریں

براہ راست جب دیکھے کوئی دنیا سہانی ہے

میں پچھتاتا ہوں کیا کیا اپنا غم کہہ کر زمانہ سے

سناتا ہوں جسے کہتا ہے میری ہی کہانی ہے

گمان بد غلط راہ طلب کے ذرہ ذرہ پر

قدم کیوں کر اٹھیں اپنے ہی دل سے بد گمانی ہے

محبت میں نہ جینے کا ارادہ ہے نہ مرنے کا

اجل پر فیصلہ ٹھہرا تو اب جینے کی ٹھانی ہے

مزاج درد سے بگڑا ہوا انداز پرسش ہے

کہیں ایسا نہ ہو کہہ دوں تمہاری مہربانی ہے