musafir hun magar kya zindagi par hukmrani hai

musāfir huuñ magar kyā zindagī par hukmrānī hai

Thahar jā.ūñ to baaqī hai guzar jā.ūñ to faanī hai

mohabbat merī rag rag meñ sharāb-e-arġhavānī hai

kahāñ kā nashsha-e-mai merā nashsha jāvedānī hai

javānī aa.ī jaañ aa.ī ġham aaya maut aa.ī hai

abhī kyā jā.iye kis kis se tāqat āzmā.ī hai

ġhalat paḌtī haiñ dard-o-ġham kī bhaTkā.ī huī nazreñ

barāh-e-rāst jab dekhe koī duniyā suhānī hai

maiñ pachhtātā huuñ kyā kyā apnā ġham kah kar zamāna se

sunātā huuñ jise kahtā hai merī hī kahānī hai

gumān-e-bad ġhalat rāh-e-talab ke zarra zarra par

qadam kyūñkar uTheñ apne hī dil se bad-gumānī hai

mohabbat meñ na jiine kā irāda hai na marne kā

ajal par faisla Thahrā to ab jiine kī Thānī hai

mizāj-e-dard se bigḌā huā andāz-e-pursish hai

kahīñ aisā na ho kah duuñ tumhārī mehrbānī hai

musafir hun magar kya zindagi par hukmrani hai

Thahar jaun to baqi hai guzar jaun to fani hai

mohabbat meri rag rag mein sharab-e-arghawani hai

kahan ka nashsha-e-mai mera nashsha jawedani hai

jawani aai jaan aai gham aaya maut aai hai

abhi kya jaiye kis kis se taqat aazmai hai

ghalat paDti hain dard-o-gham ki bhaTkai hui nazren

barah-e-rast jab dekhe koi duniya suhani hai

main pachhtata hun kya kya apna gham kah kar zamana se

sunata hun jise kahta hai meri hi kahani hai

guman-e-bad ghalat rah-e-talab ke zarra zarra par

qadam kyunkar uThen apne hi dil se bad-gumani hai

mohabbat mein na jine ka irada hai na marne ka

ajal par faisla Thahra to ab jine ki Thani hai

mizaj-e-dard se bigDa hua andaz-e-pursish hai

kahin aisa na ho kah dun tumhaari mehrbani hai