musafirat mein tera sath gar nahin hota

musāfirat meñ tirā saath gar nahīñ hotā

rah-e-hayāt meñ mujh se safar nahīñ hotā

ġham-e-hayāt shab-e-hijr kis taraf jaate

ġharīb-ḳhāna hamārā agar nahīñ hotā

shu'ūr sāda-mizājī kā aa gayā shāyad

kisī bhī shaḳhs meñ vo karr-o-far nahīñ hotā

qadīm adab se bhī tum istifāda karte raho

ki ab jo paḌhte ho vo mo'tabar nahīñ hotā

tumhāre shahr se jab tak nahīñ guzarte haiñ

musāfiroñ kā mukammal safar nahīñ hotā

vasīle jitne the utnī zarūrateñ hotīñ

to phir kabhī mutafakkir bashar nahīñ hotā

ye gumrahī kā hai 'ālam ki kuchh kaho 'kausar'

paḌhe likhoñ pe bhī koī asar nahīñ hotā

musafirat mein tera sath gar nahin hota

rah-e-hayat mein mujh se safar nahin hota

gham-e-hayat shab-e-hijr kis taraf jate

gharib-KHana hamara agar nahin hota

shu'ur sada-mizaji ka aa gaya shayad

kisi bhi shaKHs mein wo karr-o-far nahin hota

qadim adab se bhi tum istifada karte raho

ki ab jo paDhte ho wo mo'tabar nahin hota

tumhaare shahr se jab tak nahin guzarte hain

musafiron ka mukammal safar nahin hota

wasile jitne the utni zaruraten hotin

to phir kabhi mutafakkir bashar nahin hota

ye gumrahi ka hai 'alam ki kuchh kaho 'kausar'

paDhe likhon pe bhi koi asar nahin hota