مسافرت میں ترا ساتھ گر نہیں ہوتا

مسافرت میں ترا ساتھ گر نہیں ہوتا

رہ حیات میں مجھ سے سفر نہیں ہوتا

غم حیات شب ہجر کس طرف جاتے

غریب خانہ ہمارا اگر نہیں ہوتا

شعور سادہ مزاجی کا آ گیا شاید

کسی بھی شخص میں وہ کر و فر نہیں ہوتا

قدیم ادب سے بھی تم استفادہ کرتے رہو

کہ اب جو پڑھتے ہو وہ معتبر نہیں ہوتا

تمہارے شہر سے جب تک نہیں گزرتے ہیں

مسافروں کا مکمل سفر نہیں ہوتا

وسیلے جتنے تھے اتنی ضرورتیں ہوتیں

تو پھر کبھی متفکر بشر نہیں ہوتا

یہ گمرہی کا ہے عالم کہ کچھ کہو کوثرؔ

پڑھے لکھوں پہ بھی کوئی اثر نہیں ہوتا