musalsal aag mein ek aag si lagi hui hai

musalsal aag meñ ik aag sī lagī huī hai

ye maiñ jo raakh banī hai to raushnī huī hai

rukā nahīñ kisī manzil pe kārvān-e-safar

azal se ḳhuun meñ tahrīk sī chalī huī hai

ḳhamīr-e-tuḳhm meñ rakkhī huī hasīñ ḳhvāhish

gulāb ban ke har ik shāḳh par khilī huī hai

paḌā huuñ jism ke sāñche meñ hijr apnā liye

mujhe ye umr kahīñ DhūñDne ga.ī huī hai

fasīl-o-dar mujhe hairat se takte rahte haiñ

kisī darīche se kyā merī dostī huī hai

ye surḳh-o-tāza guloñ se bharī huī Tahnī

mire badan kā lahū pī ke hī baḌī huī hai

musalsal aag mein ek aag si lagi hui hai

ye main jo rakh bani hai to raushni hui hai

ruka nahin kisi manzil pe karwan-e-safar

azal se KHun mein tahrik si chali hui hai

KHamir-e-tuKHm mein rakkhi hui hasin KHwahish

gulab ban ke har ek shaKH par khili hui hai

paDa hun jism ke sanche mein hijr apna liye

mujhe ye umr kahin DhunDne gai hui hai

fasil-o-dar mujhe hairat se takte rahte hain

kisi dariche se kya meri dosti hui hai

ye surKH-o-taza gulon se bhari hui Tahni

mere badan ka lahu pi ke hi baDi hui hai