musalsal tairne wala bhi aksar haar jata hai

musalsal tairne vaalā bhī aksar haar jaatā hai

samundar se jo bach nikle to dariyā maar jaatā hai

sharāfat kā mirī charchā sar-e-bāzār kyā pahuñchā

jise dekho vahī aa kar mujhe lalkār jaatā hai

sar-e-maqtal maiñ jāñ-baḳhshī kī us se iltijā kar ke

agar sar ko bachā luuñ to mirā kirdār jaatā hai

hameñ chhū kar jo ban jaatā hai miTTī se kharā sonā

vahī ik roz ham pāras ko Thokar maar jaatā hai

hameñ talqīn kartā hai jo har lamha vo sajde meñ

ḳhudā jaane ki sachche dil se kitnī baar jaatā hai

maiñ jab bhī ghar se niklūñ har taraf ik shor uThtā hai

miyāñ dauḌo vo dekho ishq kā bīmār jaatā hai

jahāñ par farz ko ehsān samjhā jaa.e hai 'tashna'

tū apnā haq talab karne vahāñ be-kār jaatā hai

musalsal tairne wala bhi aksar haar jata hai

samundar se jo bach nikle to dariya mar jata hai

sharafat ka meri charcha sar-e-bazar kya pahuncha

jise dekho wahi aa kar mujhe lalkar jata hai

sar-e-maqtal main jaan-baKHshi ki us se iltija kar ke

agar sar ko bacha lun to mera kirdar jata hai

hamein chhu kar jo ban jata hai miTTi se khara sona

wahi ek roz hum paras ko Thokar mar jata hai

hamein talqin karta hai jo har lamha wo sajde mein

KHuda jaane ki sachche dil se kitni bar jata hai

main jab bhi ghar se niklun har taraf ek shor uThta hai

miyan dauDo wo dekho ishq ka bimar jata hai

jahan par farz ko ehsan samjha jae hai 'tashna'

tu apna haq talab karne wahan be-kar jata hai