مصحف رخ کا تمہارے جو ثنا خواں ہوتا

مصحف رخ کا تمہارے جو ثنا خواں ہوتا

دل بیتاب مرا حافظ قرآں ہوتا

مصرعۂ بحر طویل آپ بہ ایں قامت و قد

میں وہ مصرعہ نہیں جو آپ پہ چسپاں ہوتا

تیرے راکٹ سے بھی اے یار میں لیتا ٹکر

میرے قبضے میں اگر تخت سلیماں ہوتا

اس میں کچھ تیری نحوست بھی ہے شامل واعظ

ورنہ اللہ کا گھر ایسا نہ ویراں ہوتا

شیخ لانی ہی تھی بوتل تو چھپا کر لاتے

دیکھتا کیسے کوئی اس پہ جو داماں ہوتا

دیکھتا تو جو چھلکتا ہوا مینا واعظ

تیری بدھنی سے بھی ارزاں ترا ایماں ہوتا

ہوتی اے قیس جو لیلیٰ کی کوئی اور بہن

ساتھ ہاشمؔ بھی ترے چاک گریباں ہوتا