mushk si chaar-su hawa mein hai

mushk sī chār-sū havā meñ hai

kaun hai kis kī bū havā meñ hai

chūmnā chāhe sab charāġhoñ ko

kaisī lat kaisī ḳhū havā meñ hai

qatl ke ba.ad sab jale hoñge

rañg paanī meñ bū havā meñ hai

jis ne lalkārā thā zamīñ pe kabhī

aaj vo jañg-jū havā maiñ hai

jañg kyuuñ is zamīñ pe jaarī hai

jab hamārā adū havā meñ hai

kaise vo har charāġh tak pahuñche

bas yahī justujū havā meñ hai

rishta-e-ḳhāk hī nahīñ sab kuchh

kuchh namī kuchh numū havā meñ hai

hashr ke din sunāyā jā.egā

qaid har guftugū havā meñ hai

paañv ab bhī zamīñ pe haiñ 'dānish'

maiñ samajhtā thā tū havā meñ hai

mushk si chaar-su hawa mein hai

kaun hai kis ki bu hawa mein hai

chumna chahe sab charaghon ko

kaisi lat kaisi KHu hawa mein hai

qatl ke baad sab jale honge

rang pani mein bu hawa mein hai

jis ne lalkara tha zamin pe kabhi

aaj wo jang-ju hawa main hai

jang kyun is zamin pe jari hai

jab hamara adu hawa mein hai

kaise wo har charagh tak pahunche

bas yahi justuju hawa mein hai

rishta-e-KHak hi nahin sab kuchh

kuchh nami kuchh numu hawa mein hai

hashr ke din sunaya jaega

qaid har guftugu hawa mein hai

panw ab bhi zamin pe hain 'danish'

main samajhta tha tu hawa mein hai