mushkil dikhai deti hai tadbir-e-kaenat

mushkil dikhā.ī detī hai tadbīr-e-kā.enāt

phir bhī uThā ke dekh leñ shamshīr-e-kā.enāt

ġhaltīda gauharoñ ko zamīñ se nikāl kar

tīra-shabī ko dījiye tanvīr-e-kā.enāt

mehnat meñ apnā ḳhūn-e-jigar bhī milā.iye

tab jā ke ban sakegī vo tasvīr-e-kā.enāt

takmīl-e-ḳhvāb ke liye jo justujū kareñ

un ko dikhā.ī detī hai ta.abīr-e-kā.enāt

koī bhī kaam vaqt se pahle nahīñ huā

TūTegī roz-e-hashr hī zanjīr-e-kā.enāt

ye soch kar gharoñ se nikal aao dosto

karnī hai apne azm se ta.amīr-e-kā.enāt

jangal pahāḌ abr nadī dhuul dhuup aag

kitnī hasīn hai tirī jāgīr-e-kā.enāt

mushkil dikhai deti hai tadbir-e-kaenat

phir bhi uTha ke dekh len shamshir-e-kaenat

ghaltida gauharon ko zamin se nikal kar

tira-shabi ko dijiye tanwir-e-kaenat

mehnat mein apna KHun-e-jigar bhi milaiye

tab ja ke ban sakegi wo taswir-e-kaenat

takmil-e-KHwab ke liye jo justuju karen

un ko dikhai deti hai tabir-e-kaenat

koi bhi kaam waqt se pahle nahin hua

TuTegi roz-e-hashr hi zanjir-e-kaenat

ye soch kar gharon se nikal aao dosto

karni hai apne azm se tamir-e-kaenat

jangal pahaD abr nadi dhul dhup aag

kitni hasin hai teri jagir-e-kaenat