mushkil ko samajhne ka wasila nikal aata

mushkil ko samajhne kā vasīla nikal aatā

tum baat to karte koī rasta nikal aatā

ghar se jo mire sonā yā paisa nikal aatā

kis kis se mirā ḳhuun kā rishta nikal aatā

mere liye ai dost bas itnā hī bahut thā

jaisā tujhe sochā thā tū vaisā nikal aatā

maiñ joḌ to detā tirī tasvīr ke TukḌe

mushkil thā ki vo pahlā sā chehra nikal aatā

bas aur to kyā honā thā dukh-dard sunā kar

yāroñ ke liye ek tamāsha nikal aatā

aisā huuñ maiñ is vāste chubhtā huuñ nazar meñ

socho to agar maiñ kahīñ vaisā nikal aatā

achchhā huā parkhā nahīñ 'amabar' ko kisī ne

kyā jāniye kyā shaḳhs thā kaisā nikal aatā

mushkil ko samajhne ka wasila nikal aata

tum baat to karte koi rasta nikal aata

ghar se jo mere sona ya paisa nikal aata

kis kis se mera KHun ka rishta nikal aata

mere liye ai dost bas itna hi bahut tha

jaisa tujhe socha tha tu waisa nikal aata

main joD to deta teri taswir ke TukDe

mushkil tha ki wo pahla sa chehra nikal aata

bas aur to kya hona tha dukh-dard suna kar

yaron ke liye ek tamasha nikal aata

aisa hun main is waste chubhta hun nazar mein

socho to agar main kahin waisa nikal aata

achchha hua parkha nahin 'amabar' ko kisi ne

kya jaaniye kya shaKHs tha kaisa nikal aata