mushkilon mein paD gae apna KHuda kah kar tujhe

mushkiloñ meñ paḌ ga.e apnā ḳhudā kah kar tujhe

tū hī kah de ham pukāreñ aur kyā kah kar tujhe

hāl-e-dil kahne kī kyā ab bhī zarūrat rah ga.ī

jab pukārā ham ne apnā dil-rubā kah kar tujhe

jāda-e-manzil pe khā kar Thokareñ hosh aa gayā

kis qadar ḳhush the ham apnā rahnumā kah kar tujhe

tere hote terī duniyā meñ ye bedād-o-sitam

log pachhtāne lage apnā ḳhudā kah kar tujhe

ik zamāna ham se ġhussa hai ye ham ne kyā kiyā

sab ko chhoTā kar diyā sab se baḌā kah kar tujhe

saarī duniyā se adāvat mol le lī muft meñ

ham ne apnā dost apnā ham-navā kah kar tujhe

aah ye apnā safīna aur girdāb-e-balā

saḳht sharminda hue ham nāḳhudā kah kar tujhe

kis tarah ye ham vafādāroñ se dekhā jā.egā

log mahfil meñ pukāreñ bevafā kah kar tujhe

aur bhī un kī nigāhoñ meñ mohazzab ho gayā

kyā milā 'sarshār' dil kā mājrā kah kar tujhe

mushkilon mein paD gae apna KHuda kah kar tujhe

tu hi kah de hum pukaren aur kya kah kar tujhe

haal-e-dil kahne ki kya ab bhi zarurat rah gai

jab pukara hum ne apna dil-ruba kah kar tujhe

jada-e-manzil pe kha kar Thokaren hosh aa gaya

kis qadar KHush the hum apna rahnuma kah kar tujhe

tere hote teri duniya mein ye bedad-o-sitam

log pachhtane lage apna KHuda kah kar tujhe

ek zamana hum se ghussa hai ye hum ne kya kiya

sab ko chhoTa kar diya sab se baDa kah kar tujhe

sari duniya se adawat mol le li muft mein

hum ne apna dost apna ham-nawa kah kar tujhe

aah ye apna safina aur girdab-e-bala

saKHt sharminda hue hum naKHuda kah kar tujhe

kis tarah ye hum wafadaron se dekha jaega

log mahfil mein pukaren bewafa kah kar tujhe

aur bhi un ki nigahon mein mohazzab ho gaya

kya mila 'sarshaar' dil ka majra kah kar tujhe