mushtaq hi dil barson us ghuncha-dahan ka tha

mushtāq hī dil barsoñ us ġhuncha-dahan kā thā

yaaro mire aur us ke kab rabt suḳhan kā thā

vaañ bāloñ meñ vo mukhḌā jaatā thā chhupā kam kam

yaañ hashr mire dil par ik chāñd gahan kā thā

the ḳhatt-e-shikasta kī ruḳhsār tire ta.alīm

az-bas-ke hujūm un par zulfoñ kī shikan kā thā

parvāne kī himmat ke sadqe meñ ki dī shab vo

is be-par-o-bālī par qurbān lagan kā thā

āḳhir ko hameñ zālim pāmāl kiyā tū ne

andesha hameñ dil meñ tere hī chalan kā thā

maiñ us qad o aariz ko kar yaad bahut royā

mazkūr gulistāñ meñ kuchh sarv-o-saman kā thā

juuñ ashk-e-sar-e-mizhgāñ ham phir na nazar aa.e

az-bas-ke yahāñ vaqfa ik chashm-e-zadan kā thā

do phuul koī rakh kar guzrā thā jo kal yaañ se

turbat pe mirī bulvā murġhān-e-chaman kā thā

jis murġh-e-chaman ko maiñ dekhā to chaman meñ bhī

hasrat-kash-e-nazzāra us rashk-e-chaman kā thā

shab dekh mah-e-tābāñ thā 'mus.hafī' tū hairāñ

kyā is meñ bhī kuchh naqsha us sīm-badan kā thā

mushtaq hi dil barson us ghuncha-dahan ka tha

yaro mere aur us ke kab rabt suKHan ka tha

wan baalon mein wo mukhDa jata tha chhupa kam kam

yan hashr mere dil par ek chand gahan ka tha

the KHatt-e-shikasta ki ruKHsar tere talim

az-bas-ke hujum un par zulfon ki shikan ka tha

parwane ki himmat ke sadqe mein ki di shab wo

is be-par-o-baali par qurban lagan ka tha

aaKHir ko hamein zalim pamal kiya tu ne

andesha hamein dil mein tere hi chalan ka tha

main us qad o aariz ko kar yaad bahut roya

mazkur gulistan mein kuchh sarw-o-saman ka tha

jun ashk-e-sar-e-mizhgan hum phir na nazar aae

az-bas-ke yahan waqfa ek chashm-e-zadan ka tha

do phul koi rakh kar guzra tha jo kal yan se

turbat pe meri bulwa murghan-e-chaman ka tha

jis murgh-e-chaman ko main dekha to chaman mein bhi

hasrat-kash-e-nazzara us rashk-e-chaman ka tha

shab dekh mah-e-taban tha 'mushafi' tu hairan

kya is mein bhi kuchh naqsha us sim-badan ka tha