مصیبت کا یہ لمحہ کاٹنا ہے

مصیبت کا یہ لمحہ کاٹنا ہے

مجھے اوروں سے اچھا کاٹنا ہے

درانتی فکر کی پینی کروں گا

مجھے مصرعے کو تھوڑا کاٹنا ہے

ابھی میدان سے باہر نہ ہوں گے

ہمیں کچھ دن تو جلوہ کاٹنا ہے

غنیم ملک سے جیتیں گے ہم ہی

ذرا اک آدھ دستہ کاٹنا ہے

بچھڑ کر اس سے زندہ ہوں ابھی تک

اذیت کا یہ وقفہ کاٹنا ہے

عمل کے نت نئے تیشہ بنا کر

مجھے قسمت کا لکھا کاٹنا ہے

برا تو کاٹ لیں گے وقت تنہا

تمہارے ساتھ اچھا کاٹنا ہے

میں اس سے مسکرا کر ہی ملوں گا

خوشی سے آج غصہ کاٹنا ہے

انا کی تیغ کو کچھ تیز کر لو

فقیرو تم کو رتبہ کاٹنا ہے

ہمارا عشق ہو پایا نہ کامل

سو اب اوروں کا پتا کاٹنا ہے