musibat sar se Talti ja rahi hai

musībat sar se Taltī jā rahī hai

hamārī umr Dhaltī jā rahī hai

kahāñ hai zindagī ab zindagī meñ

faqat ik nabz chaltī jā rahī hai

musalsal bhaap ban kar uḌ rahā huuñ

musalsal aag jaltī jā rahī hai

ajab hai sāneha jiine kī ḳhvāhish

mire dil se nikaltī jā rahī hai

ḳhafā kyoñ haiñ mire hālāt mujh se

havā kyoñ ruḳh badaltī jā rahī hai

ye sāñseñ mo.ajize meñ Dhal rahī haiñ

karāmat ḳhuuñ meñ chaltī jā rahī hai

savā neze pe sūraj aa rahā hai

mirī har samt galtī jā rahī hai

mujhe dhar kar mere be-dar makāñ meñ

vo ghar ko haath maltī jā rahī hai

ye kaise Dank haiñ siine meñ 'tāhir'

halaq meñ jaañ uchhaltī jā rahī hai

musibat sar se Talti ja rahi hai

hamari umr Dhalti ja rahi hai

kahan hai zindagi ab zindagi mein

faqat ek nabz chalti ja rahi hai

musalsal bhap ban kar uD raha hun

musalsal aag jalti ja rahi hai

ajab hai saneha jine ki KHwahish

mere dil se nikalti ja rahi hai

KHafa kyon hain mere haalat mujh se

hawa kyon ruKH badalti ja rahi hai

ye sansen moajize mein Dhal rahi hain

karamat KHun mein chalti ja rahi hai

sawa neze pe suraj aa raha hai

meri har samt galti ja rahi hai

mujhe dhar kar mere be-dar makan mein

wo ghar ko hath malti ja rahi hai

ye kaise Dank hain sine mein 'tahir'

halaq mein jaan uchhalti ja rahi hai