muskura kar KHitab karte ho

muskurā kar ḳhitāb karte ho

ādateñ kyuuñ ḳharāb karte ho

maar do mujh ko rahm-dil ho kar

kyā ye kār-e-savāb karte ho

muflisī aur kis ko kahte haiñ!

daulatoñ kā hisāb karte ho

sirf ik iltijā hai chhoTī sī

kyā use bāryāb karte ho

ham to tum ko pasand kar baiThe

tum kise intiḳhāb karte ho

ḳhaar kī nok ko lahū de kar

intizār-e-gulāb karte ho

ye na.ī ehtiyāt dekhī hai

aa.ine se hijāb karte ho

kyā zarūrat hai bahs karne kī

kyuuñ kaleja kabāb karte ho

ho chukā jo hisāb honā thā

aur ab kyā hisāb karte ho

ek din ai 'adam' na pī to kyā

roz shaġhl-e-sharāb karte ho

kitne be-rahm ho 'adam' tum bhī

zikr-e-ahd-e-shabāb karte ho

ho kisī kī ḳhushī gar is meñ 'adam'

jurm kā irtikāb karte ho

muskura kar KHitab karte ho

aadaten kyun KHarab karte ho

mar do mujh ko rahm-dil ho kar

kya ye kar-e-sawab karte ho

muflisi aur kis ko kahte hain!

daulaton ka hisab karte ho

sirf ek iltija hai chhoTi si

kya use baryab karte ho

hum to tum ko pasand kar baiThe

tum kise intiKHab karte ho

KHar ki nok ko lahu de kar

intizar-e-gulab karte ho

ye nai ehtiyat dekhi hai

aaine se hijab karte ho

kya zarurat hai bahs karne ki

kyun kaleja kabab karte ho

ho chuka jo hisab hona tha

aur ab kya hisab karte ho

ek din ai 'adam' na pi to kya

roz shaghl-e-sharab karte ho

kitne be-rahm ho 'adam' tum bhi

zikr-e-ahd-e-shabab karte ho

ho kisi ki KHushi gar is mein 'adam'

jurm ka irtikab karte ho