muskuraen muskuraen muskuraen mere sath

muskurā.eñ muskurā.eñ muskurā.eñ mere saath

aap duniyā ko ye ā.īna dikhā.eñ mere saath

laakh tanhā huuñ magar ehsās-e-tanhā.ī nahīñ

rāt-din haiñ jānī-pahchānī sadā.eñ mere saath

jin ko rashk aatā hai merī jur.at-e-parvāz par

bāzū-e-himmat meñ vo bhī par lagā.eñ mere saath

jin du'āoñ se maiñ pahuñchā thā harīm-e-nāz tak

kyā kahūñ dar par vo thiiñ kis kī du'ā.eñ mere saath

muztarib haiñ muntazir haiñ kis qadar bechain haiñ

ye havā.eñ ye ghaTā.eñ ye fazā.eñ mere saath

har navā-e-mahfil-e-hastī bane firdaus-e-gosh

vo agar merī hī lai meñ gungunā.eñ mere saath

maiñ to ab rāh-e-vafā meñ ho chukā huuñ gāmzan

aap kī marzī hai aap aa.eñ na aa.eñ mere saath

ḳhuld meñ rahte hue kitnī farāġhat thī 'urūj

ab ye duniyā aur duniyā kī balā.eñ mere saath

muskuraen muskuraen muskuraen mere sath

aap duniya ko ye aaina dikhaen mere sath

lakh tanha hun magar ehsas-e-tanhai nahin

raat-din hain jaani-pahchani sadaen mere sath

jin ko rashk aata hai meri jurat-e-parwaz par

bazu-e-himmat mein wo bhi par lagaen mere sath

jin du'aon se main pahuncha tha harim-e-naz tak

kya kahun dar par wo thin kis ki du'aen mere sath

muztarib hain muntazir hain kis qadar bechain hain

ye hawaen ye ghaTaen ye fazaen mere sath

har nawa-e-mahfil-e-hasti bane firdaus-e-gosh

wo agar meri hi lai mein gungunaen mere sath

main to ab rah-e-wafa mein ho chuka hun gamzan

aap ki marzi hai aap aaen na aaen mere sath

KHuld mein rahte hue kitni faraghat thi 'uruj

ab ye duniya aur duniya ki balaen mere sath