muskurane ki ada mujhko sikhati hai ghazal

muskurāne kī adā mujh ko sikhātī hai ġhazal

koī mushkil ho mirā saath nibhātī hai ġhazal

dāstāñ husn-o-mohabbat kī sunātī hai ġhazal

ham-navā apnā zamāne ko banātī hai ġhazal

niiñd uḌ jaatī hai rātoñ ko jo āñkhoñ se kabhī

apnī āġhosh-e-mohabbat meñ sulātī hai ġhazal

ġham se āzād bashar hotā hai sunte hī ise

ahl-e-mahfil pe asar aisā jamātī hai ġhazal

kaise kah duuñ ki hai mahdūd ġhazal kī duniyā

shaan urdu kī zamāne meñ baḌhātī hai ġhazal

phailtā hai rah-e-hastī meñ añdherā to 'kamāl'

fikr-o-ehsās kī ik sham.a jalātī hai ġhazal

muskurane ki ada mujh ko sikhati hai ghazal

koi mushkil ho mera sath nibhati hai ghazal

dastan husn-o-mohabbat ki sunati hai ghazal

ham-nawa apna zamane ko banati hai ghazal

nind uD jati hai raaton ko jo aankhon se kabhi

apni aaghosh-e-mohabbat mein sulati hai ghazal

gham se aazad bashar hota hai sunte hi ise

ahl-e-mahfil pe asar aisa jamati hai ghazal

kaise kah dun ki hai mahdud ghazal ki duniya

shan urdu ki zamane mein baDhati hai ghazal

phailta hai rah-e-hasti mein andhera to 'kamal'

fikr-o-ehsas ki ek shama jalati hai ghazal