muskuraate the jo mera chaak-daman dekh kar

muskurāte the jo merā chāk-dāmāñ dekh kar

aaj sharminda haiñ vo apnā garebāñ dekh kar

ārzū-e-dīd dil kī dil meñ āḳhir rah ga.ī

mahv-e-hairat ho gayā tasvīr-e-jānāñ dekh kar

kis qadar badlī hai duniyā ne mohabbat kī ravish

pher letā hai nazar insāñ ko insāñ dekh kar

aa.e the taskīn dene vo dil-e-betāb ko

ḳhud pareshāñ ho ga.e mujh ko pareshāñ dekh kar

chūmtī haiñ manzileñ ḳhud ahl-e-himmat ke qadam

hausla mat haar jaanā zor-e-tūfāñ dekh kar

vā-e-qismat vo to merā hī jalā thā āshiyāñ

ḳhush huā thā maiñ gulistāñ meñ charāġhāñ dekh kar

'nūr' andāza bahāroñ kā lagā lete haiñ sab

merā dāmāñ dekh kar merā girebāñ dekh kar

muskuraate the jo mera chaak-daman dekh kar

aaj sharminda hain wo apna gareban dekh kar

aarzu-e-did dil ki dil mein aaKHir rah gai

mahw-e-hairat ho gaya taswir-e-jaanan dekh kar

kis qadar badli hai duniya ne mohabbat ki rawish

pher leta hai nazar insan ko insan dekh kar

aae the taskin dene wo dil-e-betab ko

KHud pareshan ho gae mujh ko pareshan dekh kar

chumti hain manzilen KHud ahl-e-himmat ke qadam

hausla mat haar jaana zor-e-tufan dekh kar

wa-e-qismat wo to mera hi jala tha aashiyan

KHush hua tha main gulistan mein charaghan dekh kar

'nur' andaza bahaaron ka laga lete hain sab

mera daman dekh kar mera gireban dekh kar