mustaqil dard ka sailab kahan achchha hai

mustaqil dard kā sailāb kahāñ achchhā hai

vaqfa-e-silsila-e-āh-o-fuġhāñ achchhā hai

ho na jaa.e mire lahje kā asar zahrīlā

in dinoñ muñh se nikal jaa.e zabāñ achchhā hai

mujh se māñgegī mirī aañkh gulābī manzar

ho mire haath meñ tasvīr-e-butāñ achchhā hai

jin ke siine meñ ta.assub nahīñ paltā koī

aise logoñ ke liye saarā jahāñ achchhā hai

kitne chālāk haiñ ye ūñchī havelī vaale

ham se kahte haiñ ki miTTī kā makāñ achchhā hai

zer-e-lab reñgtā rahtā hai tabassum 'sūraj'

is qayāmat se to aahoñ kā dhuāñ rahtā hai

mustaqil dard ka sailab kahan achchha hai

waqfa-e-silsila-e-ah-o-fughan achchha hai

ho na jae mere lahje ka asar zahrila

in dinon munh se nikal jae zaban achchha hai

mujh se mangegi meri aankh gulabi manzar

ho mere hath mein taswir-e-butan achchha hai

jin ke sine mein tassub nahin palta koi

aise logon ke liye sara jahan achchha hai

kitne chaalak hain ye unchi haweli wale

hum se kahte hain ki miTTi ka makan achchha hai

zer-e-lab rengta rahta hai tabassum 'suraj'

is qayamat se to aahon ka dhuan rahta hai