mustaqil masafat hai na-tamam koshish hai

mustaqil masāfat hai nā-tamām koshish hai

rāh-e-zindagī kyā hai jā-e-āzmā.ish hai

sabr-o-zabt kī sarhad chhū chukī hai be-zārī

ḳhāmushī ke maqtal meñ sarbuland ḳhvāhish hai

pāsh-pāsh honā hai aa.ina rifāqat kā

jazba-e-hiqārat se pattharoñ meñ jumbish hai

ḳhvāb ke janāze par nauha-ḳhvāñ haiñ ta.abīreñ

dāman-e-nadāmat par āñsuoñ kī pursish hai

roz-o-shab badalte haiñ zāviye muqaddar ke

haath kī lakīroñ meñ ishtihār-e-gardish hai

aañkh aañkh ḳhūñ-nābī tār-tār dāmānī

jism jism zaḳhmoñ kī har taraf numā.ish hai

ab rah-e-mohabbat par har qadam hai mustahkam

rahnumā-e-dil 'sālim' hausloñ kī yūrish hai

mustaqil masafat hai na-tamam koshish hai

rah-e-zindagi kya hai ja-e-azmaish hai

sabr-o-zabt ki sarhad chhu chuki hai be-zari

KHamushi ke maqtal mein sarbuland KHwahish hai

pash-pash hona hai aaina rifaqat ka

jazba-e-hiqarat se pattharon mein jumbish hai

KHwab ke janaze par nauha-KHwan hain tabiren

daman-e-nadamat par aansuon ki pursish hai

roz-o-shab badalte hain zawiye muqaddar ke

hath ki lakiron mein ishtihaar-e-gardish hai

aankh aankh KHun-nabi tar-tar damani

jism jism zaKHmon ki har taraf numaish hai

ab rah-e-mohabbat par har qadam hai mustahkam

rahnuma-e-dil 'salim' hauslon ki yurish hai