mutmain bhi kis qadar the apni qurbani se hum

mutma.in bhī kis qadar the apnī qurbānī se ham

rad kiye jaane lage ab kitnī āsānī se ham

āñsuoñ kī aag ne sūraj banā Daalā hameñ

bujh nahīñ sakte samundar ab tire paanī se ham

itnī 'ādat paḌ chukī mushkil-pasandī kī hameñ

ḳhud se bhī ab mil nahīñ paate haiñ āsānī se ham

zindagī ko dekhne kī aarzū meñ yuuñ huā

aa.ine ko dekhte rahte haiñ hairānī se ham

aaj ham utre hue dariyā se Darte haiñ 'ra.īs'

khelte the kal talak maujoñ kī tuġhyānī se ham

mutmain bhi kis qadar the apni qurbani se hum

rad kiye jaane lage ab kitni aasani se hum

aansuon ki aag ne suraj bana Dala hamein

bujh nahin sakte samundar ab tere pani se hum

itni 'adat paD chuki mushkil-pasandi ki hamein

KHud se bhi ab mil nahin pate hain aasani se hum

zindagi ko dekhne ki aarzu mein yun hua

aaine ko dekhte rahte hain hairani se hum

aaj hum utre hue dariya se Darte hain 'rais'

khelte the kal talak maujon ki tughyani se hum