muttaqi sab chhaT gae mujrim hi mujrim rah gae

muttaqī sab chhaT ga.e mujrim hī mujrim rah ga.e

josh meñ ab rahmat-e-parvardigār aane ko hai

vasl kā iqrār karke kar diyā hai be-qarār

nā-umīdī meñ bhī jab dekhā qarār aane ko hai

vo suneñ ahvāl-e-dard-e-dil ḳhudā kī shaan hai

ye ghaḌī ai dil kahīñ phir baar baar aane ko hai

aish kī hasrat abas hai fikr-e-ranj-o-ġham fuzūl

maut jab har haal meñ anjām-e-kār aane ko hai

maut kā to ġham nahīñ aatī hai aa.egī zarūr

maut se pahle to shām-e-intizār aane ko hai

mil ga.iiñ jab ḳhaak meñ sab hasrateñ apnī 'munīr'

ham ko kyā gulshan meñ jo fasl-e-bahār aane ko hai

muttaqi sab chhaT gae mujrim hi mujrim rah gae

josh mein ab rahmat-e-parwardigar aane ko hai

wasl ka iqrar karke kar diya hai be-qarar

na-umidi mein bhi jab dekha qarar aane ko hai

wo sunen ahwal-e-dard-e-dil KHuda ki shan hai

ye ghaDi ai dil kahin phir bar bar aane ko hai

aish ki hasrat abas hai fikr-e-ranj-o-gham fuzul

maut jab har haal mein anjam-e-kar aane ko hai

maut ka to gham nahin aati hai aaegi zarur

maut se pahle to sham-e-intizar aane ko hai

mil gain jab KHak mein sab hasraten apni 'munir'

hum ko kya gulshan mein jo fasl-e-bahaar aane ko hai