muztarib aur hua zauq-e-nazar aaKHir-e-shab

muztarib aur huā zauq-e-nazar āḳhir-e-shab

band ummīd ke sab ho ga.e dar āḳhir-e-shab

ai asīrān-e-qafas mere alāva tum ko

koī degā na bahāroñ kī ḳhabar āḳhir-e-shab

ham se hotā bhī ilāj-e-dil-e-betāb to kyā

aur baḌhtā hī gayā dard-e-jigar āḳhir-e-shab

jo ġharīboñ ke haiñ hamdard unheñ yaad nahīñ

kitne logoñ ke jalā.e ga.e ghar āḳhir-e-shab

zindagī qābil-e-tāzīm banī duniyā meñ

un ke jalvoñ se jo Takrā.ī nazar āḳhir-e-shab

fahm-o-idrāk ke ajzā-e-pareshāñ kī qasam

rang laayā mire nāloñ kā asar āḳhir-e-shab

is tarah bah chale āñkhoñ se musalsal aañsū

ho 'sahar' jaise sitāroñ kā safar āḳhir-e-shab

muztarib aur hua zauq-e-nazar aaKHir-e-shab

band ummid ke sab ho gae dar aaKHir-e-shab

ai asiran-e-qafas mere alawa tum ko

koi dega na bahaaron ki KHabar aaKHir-e-shab

hum se hota bhi ilaj-e-dil-e-betab to kya

aur baDhta hi gaya dard-e-jigar aaKHir-e-shab

jo gharibon ke hain hamdard unhen yaad nahin

kitne logon ke jalae gae ghar aaKHir-e-shab

zindagi qabil-e-tazim bani duniya mein

un ke jalwon se jo Takrai nazar aaKHir-e-shab

fahm-o-idrak ke ajza-e-pareshan ki qasam

rang laya mere nalon ka asar aaKHir-e-shab

is tarah bah chale aankhon se musalsal aansu

ho 'sahar' jaise sitaron ka safar aaKHir-e-shab