muztarib hun ab ye ji ki baat hai

muztarib huuñ ab ye jī kī baat hai

afv kiije be-ḳhudī kī baat hai

saikḌoñ ushshāq ke toḌe haiñ dil

kyā tumhārī nāzukī kī baat hai

kyā ajab pūchhe na koī hashr meñ

ek ye bhī be-kasī kī baat hai

jis fuġhāñ se māñgte the sab panāh

ab vo ik be-tāqatī kī baat hai

muddateñ guzrīñ visāl-e-yār ko

merī nazroñ meñ abhī kī baat hai

kahte haiñ anjām us kā maut hai

jis qadar ġham ho ḳhushī kī baat hai

iztirāb-e-shauq meñ kahnī paḌī

jo tirī āzurdagī kī baat hai

ai dil ummīd is se hai tāsīr kī

ye fuġhāñ hai yā valī kī baat hai

phirte haiñ ahd-e-vafā se ham koī

ye bhī tum se aadmī kī baat hai

sach kahā hai dil ko hai ik dil se raah

un ke lab par mere jī kī baat hai

ġhair se kuchh kah ke mujh se kahte haiñ

tum ko kyā matlab kisī kī baat hai

va.ada kyuuñ karte ho kah doge abhī

yaad kis ko hai kabhī kī baat hai

mujh pe vo hañgāma guzrā hai ki log

kal kaheñge aaj hī kī baat hai

dahr meñ 'sālik' ye phailā hai nifāq

dostī bhī dushmanī kī baat hai

muztarib hun ab ye ji ki baat hai

afw kije be-KHudi ki baat hai

saikDon ushshaq ke toDe hain dil

kya tumhaari nazuki ki baat hai

kya ajab puchhe na koi hashr mein

ek ye bhi be-kasi ki baat hai

jis fughan se mangte the sab panah

ab wo ek be-taqati ki baat hai

muddaten guzrin visal-e-yar ko

meri nazron mein abhi ki baat hai

kahte hain anjam us ka maut hai

jis qadar gham ho KHushi ki baat hai

iztirab-e-shauq mein kahni paDi

jo teri aazurdagi ki baat hai

ai dil ummid is se hai tasir ki

ye fughan hai ya wali ki baat hai

phirte hain ahd-e-wafa se hum koi

ye bhi tum se aadmi ki baat hai

sach kaha hai dil ko hai ek dil se rah

un ke lab par mere ji ki baat hai

ghair se kuchh kah ke mujh se kahte hain

tum ko kya matlab kisi ki baat hai

wada kyun karte ho kah doge abhi

yaad kis ko hai kabhi ki baat hai

mujh pe wo hangama guzra hai ki log

kal kahenge aaj hi ki baat hai

dahr mein 'salik' ye phaila hai nifaq

dosti bhi dushmani ki baat hai