na aaenge lauT kar wo phir bhi main umr bhar intizar kar lun

na ā.eñge lauT kar vo phir bhī maiñ umr bhar intizār kar luuñ

idhar to aa ai ġham-e-mohabbat tujhe hī jī bhar ke pyaar kar luuñ

na jaane kab tak Dhale shab-e-ġham na jaane sub.h-e-umīd kab ho

qadam qadam par bichhā luuñ taare nafas nafas sho.ala-bār kar luuñ

kabhī ayādat huī na us se kabhī kisī se na haal pūchhā

marīz-e-ġham par vo mehrbāñ hai ye kaise maiñ e.atibār kar luuñ

abhī salāmat hai azm-e-mohkam abhī hai baaqī lahū ragoñ meñ

ulaT ke rakh duuñ nizām-e-gulshan ḳhizāñ ba-rang-e-bahār kar luuñ

zarā Thahar ai junūn-e-ulfat tū le chalā hai kahāñ abhī se

matā-e-dil jab luTā chukā huuñ to jaañ bhī un par nisār kar luuñ

yahīñ bichhaḌ ke maiñ ro paḌā thā yahīñ hai bhīgā zamīñ kā āñchal

yahīñ phir us se milan bhī hogā yahīñ pe maiñ intizār kar luuñ

nahīñ hai baaqī agar patange to rah ke tanhā udaas hogī

lahad se uTh kar 'asīr' maiñ hī tavāf-e-sham.a-e-mazār kar luuñ

na aaenge lauT kar wo phir bhi main umr bhar intizar kar lun

idhar to aa ai gham-e-mohabbat tujhe hi ji bhar ke pyar kar lun

na jaane kab tak Dhale shab-e-gham na jaane subh-e-umid kab ho

qadam qadam par bichha lun tare nafas nafas shoala-bar kar lun

kabhi ayaadat hui na us se kabhi kisi se na haal puchha

mariz-e-gham par wo mehrban hai ye kaise main eatibar kar lun

abhi salamat hai azm-e-mohkam abhi hai baqi lahu ragon mein

ulaT ke rakh dun nizam-e-gulshan KHizan ba-rang-e-bahaar kar lun

zara Thahar ai junun-e-ulfat tu le chala hai kahan abhi se

mata-e-dil jab luTa chuka hun to jaan bhi un par nisar kar lun

yahin bichhaD ke main ro paDa tha yahin hai bhiga zamin ka aanchal

yahin phir us se milan bhi hoga yahin pe main intizar kar lun

nahin hai baqi agar patange to rah ke tanha udas hogi

lahad se uTh kar 'asir' main hi tawaf-e-shama-e-mazar kar lun