na aana tha na aaKHir mujhko andaz-e-bayan aaya

na aanā thā na āḳhir mujh ko andāz-e-bayāñ aayā

karam to dekhiye us dar se phir bhī shādmāñ aayā

nazar aane lagī ab to tajallī-pairahan har shai

jabīn-e-shauq sajda kar ki un kā āstāñ aayā

duhā.ī hai shu.ūr-e-bandagī terī duhā.ī hai

vo aayā vo maqām-e-sajda-e-dil nā-gahāñ aayā

agar sādiq hai zauq-e-justujū to ek din ai dil

pukār uTTheñge ḳhud zarre vo un kā āstāñ aayā

achānak mach ga.ī halchal sī duniyā-e-tahammul meñ

sar-e-mizhgāñ jab apne āñsuoñ kā kārvāñ aayā

ham hī kuchh jānte haiñ qīmat in paanī ke qatroñ kī

inhīñ ashkoñ kā sadqa hai ki andāz-e-bayāñ aayā

'shafaq' mujh sā bhī nākām-e-tamannā koī kyā hogā

huī mujh ko talāsh apnī jab un kā āstāñ aayā

na aana tha na aaKHir mujh ko andaz-e-bayan aaya

karam to dekhiye us dar se phir bhi shadman aaya

nazar aane lagi ab to tajalli-pairahan har shai

jabin-e-shauq sajda kar ki un ka aastan aaya

duhai hai shuur-e-bandagi teri duhai hai

wo aaya wo maqam-e-sajda-e-dil na-gahan aaya

agar sadiq hai zauq-e-justuju to ek din ai dil

pukar uTThenge KHud zarre wo un ka aastan aaya

achanak mach gai halchal si duniya-e-tahammul mein

sar-e-mizhgan jab apne aansuon ka karwan aaya

hum hi kuchh jaante hain qimat in pani ke qatron ki

inhin ashkon ka sadqa hai ki andaz-e-bayan aaya

'shafaq' mujh sa bhi nakaam-e-tamanna koi kya hoga

hui mujh ko talash apni jab un ka aastan aaya