na aasman ko chhu kar na hi takan ke baad

na āsmān ko chhū kar na hī takān ke baa'd

parind lauT ke aayā hai kuchh uḌaan ke baa'd

bichhaḌ ke maañ se kaḌī dhuup meñ jale aksar

milā sukūn kahāñ us ke sā.ebān ke baa'd

sukūn paa.e to paa.e bhī kis tarah insāñ

haiñ imtihān ka.ī ek imtihān ke baa'd

phir us ke paañv kī zanjīr ban ga.ī ġhurbat

banā sakā na koī ghar jale makān ke baa'd

ḳhushī se ghar thā mo.attar ajab sī raunaq thī

udaas ho gayā māhaul mehmān ke baa'd

jo lūTte haiñ maze farsh-e-gul ke bistar par

vo farsh-e-ḳhāk pe so.eñge is jahān ke baa'd

kisī uḌaan ko me.arāj-e-fan samajhnā kyā

haiñ āsmān ka.ī 'nasr' āsmān ke baa'd

na aasman ko chhu kar na hi takan ke ba'd

parind lauT ke aaya hai kuchh uDan ke ba'd

bichhaD ke man se kaDi dhup mein jale aksar

mila sukun kahan us ke saeban ke ba'd

sukun pae to pae bhi kis tarah insan

hain imtihan kai ek imtihan ke ba'd

phir us ke panw ki zanjir ban gai ghurbat

bana saka na koi ghar jale makan ke ba'd

KHushi se ghar tha moattar ajab si raunaq thi

udas ho gaya mahaul mehman ke ba'd

jo luTte hain maze farsh-e-gul ke bistar par

wo farsh-e-KHak pe soenge is jahan ke ba'd

kisi uDan ko mearaj-e-fan samajhna kya

hain aasman kai 'nasr' aasman ke ba'd