na aaya kar ke wada wasl ka iqrar tha kya tha

na aayā kar ke va.ada vasl kā iqrār thā kyā thā

kisī ke bas meñ thā majbūr thā lāchār thā kyā thā

burā ho bad-gumānī kā vo naama ġhair kā samjhā

hamāre haath meñ to parcha-e-aḳhbār thā kyā thā

sadā sunte hī goyā murdanī sī chhā ga.ī mujh par

ye shor-e-sūr thā yā vasl kā inkār thā kyā thā

ḳhudā kā dost hai ta.amīr-e-dil jo shaḳhs kartā ho

ḳhalīlullāh bhī ka.aba kā ik me.amār thā kyā thā

na aa.e tum na aao maiñ ne kyā kuchh minnateñ kī thiiñ

tumhīñ ne ḳhud kiyā thā ahd ye iqrār thā kyā thā

havā meñ jab uḌā parda to ik bijlī sī kaundī thī

ḳhudā jaane tumhārā partav-e-ruḳhsār thā kyā thā

milā tū ham se mahfil meñ jo shab ko ġhair kyuuñ bigḌā

tirā hākim thā Thekā-dār thā muḳhtār thā kyā thā

mirī mayyat pe mātam karte ho allāh-re chālākī

ḳhabar hai ḳhud tumheñ muddat se maiñ bīmār thā kyā thā

hazāroñ hasrateñ betāb thiiñ bāhar nikalne ko

vo sote meñ bhī 'parvīñ' fitna-e-bedār thā kyā thā

na aaya kar ke wada wasl ka iqrar tha kya tha

kisi ke bas mein tha majbur tha lachaar tha kya tha

bura ho bad-gumani ka wo nama ghair ka samjha

hamare hath mein to parcha-e-aKHbar tha kya tha

sada sunte hi goya murdani si chha gai mujh par

ye shor-e-sur tha ya wasl ka inkar tha kya tha

KHuda ka dost hai tamir-e-dil jo shaKHs karta ho

KHalilullah bhi kaba ka ek meamar tha kya tha

na aae tum na aao main ne kya kuchh minnaten ki thin

tumhin ne KHud kiya tha ahd ye iqrar tha kya tha

hawa mein jab uDa parda to ek bijli si kaundi thi

KHuda jaane tumhaara partaw-e-ruKHsar tha kya tha

mila tu hum se mahfil mein jo shab ko ghair kyun bigDa

tera hakim tha Theka-dar tha muKHtar tha kya tha

meri mayyat pe matam karte ho allah-re chaalaki

KHabar hai KHud tumhein muddat se main bimar tha kya tha

hazaron hasraten betab thin bahar nikalne ko

wo sote mein bhi 'parwin' fitna-e-bedar tha kya tha