na aaya maza shab ki tanhaiyon mein

na aayā maza shab kī tanhā.iyoñ meñ

sahar ho ga.ī chand añgḌā.iyoñ meñ

na rañgīniyoñ meñ na rānā.iyoñ meñ

nazar ghir ga.ī apnī parchhā.iyoñ meñ

mujhe muskurā muskurā kar na dekho

mire saath tum bhī ho rusvā.iyoñ meñ

ġhazab ho gayā un kī mahfil se aanā

ghirā jā rahā huuñ tamāshā.iyoñ meñ

mohabbat hai yā aaj tark-e-mohabbat

zarā mil to jaa.eñ vo tanhā.iyoñ meñ

idhar aao tum ko nazar lag na jaa.e

chhupā luuñ tumheñ dil kī gahrā.iyoñ meñ

are sunñe vaalo ye naġhme nahīñ haiñ

mire dil kī chīḳheñ haiñ shahnā.iyoñ meñ

vo ai 'kaif' jis din se mere hue haiñ

to saarā zamāna hai shaidā.iyoñ meñ

na aaya maza shab ki tanhaiyon mein

sahar ho gai chand angDaiyon mein

na ranginiyon mein na ranaiyon mein

nazar ghir gai apni parchhaiyon mein

mujhe muskura muskura kar na dekho

mere sath tum bhi ho ruswaiyon mein

ghazab ho gaya un ki mahfil se aana

ghira ja raha hun tamashaiyon mein

mohabbat hai ya aaj tark-e-mohabbat

zara mil to jaen wo tanhaiyon mein

idhar aao tum ko nazar lag na jae

chhupa lun tumhein dil ki gahraiyon mein

are sunne walo ye naghme nahin hain

mere dil ki chiKHen hain shahnaiyon mein

wo ai 'kaif' jis din se mere hue hain

to sara zamana hai shaidaiyon mein