na ab wo dil hai na wo dard-e-dil ke afsane

na ab vo dil hai na vo dard-e-dil ke afsāne

ġham-e-jahāñ ne ye kyā kar diyā ḳhudā jaane

na iztirāb na rāhat na aarzū na gurez

dhuāñ dhuāñ haiñ faqat zindagī ke kāshāne

zamīñ kī tangī-e-dāmāñ se tang-dil ho kar

chale haiñ sū-e-falak irtiqā ke divāne

musāfiroñ ke lahū se jalā jalā ke charāġh

ye kaun uThā hai zamāne ko raah dikhlāne

hazār jām-e-fareb-e-nazar piye lekin

mujhe sañbhāl liyā merī laġhzish-e-pā ne

shu.ūr-o-fikr ke jalte hue charāġhoñ meñ

hayāt-e-nau ke murattab hue haiñ afsāne

hamārā dast-e-tasarruf bahār par hotā

to aaj ḳhār-ba-dāmāñ na hote vīrāne

baḌhā ga.e haiñ ujāloñ kī zindagī kitnī

siyāh raat meñ jal jal ke aaj parvāne

ġham-e-zamāna ġham-e-zindagī ġham-e-jānāñ

ye haiñ 'kalīm' mire mai-kade ke paimāne

na ab wo dil hai na wo dard-e-dil ke afsane

gham-e-jahan ne ye kya kar diya KHuda jaane

na iztirab na rahat na aarzu na gurez

dhuan dhuan hain faqat zindagi ke kashane

zamin ki tangi-e-daman se tang-dil ho kar

chale hain su-e-falak irtiqa ke diwane

musafiron ke lahu se jala jala ke charagh

ye kaun uTha hai zamane ko rah dikhlane

hazar jam-e-fareb-e-nazar piye lekin

mujhe sanbhaal liya meri laghzish-e-pa ne

shuur-o-fikr ke jalte hue charaghon mein

hayat-e-nau ke murattab hue hain afsane

hamara dast-e-tasarruf bahaar par hota

to aaj KHar-ba-daman na hote virane

baDha gae hain ujalon ki zindagi kitni

siyah raat mein jal jal ke aaj parwane

gham-e-zamana gham-e-zindagi gham-e-jaanan

ye hain 'kalim' mere mai-kade ke paimane