نہ اب وہ دل ہے نہ وہ درد دل کے افسانے

نہ اب وہ دل ہے نہ وہ درد دل کے افسانے

غم جہاں نے یہ کیا کر دیا خدا جانے

نہ اضطراب نہ راحت نہ آرزو نہ گریز

دھواں دھواں ہیں فقط زندگی کے کاشانے

زمیں کی تنگئ داماں سے تنگ دل ہو کر

چلے ہیں سوئے فلک ارتقا کے دوانے

مسافروں کے لہو سے جلا جلا کے چراغ

یہ کون اٹھا ہے زمانے کو راہ دکھلانے

ہزار جام فریب نظر پئے لیکن

مجھے سنبھال لیا میری لغزش پا نے

شعور و فکر کے جلتے ہوئے چراغوں میں

حیات نو کے مرتب ہوئے ہیں افسانے

ہمارا دست تصرف بہار پر ہوتا

تو آج خار بہ داماں نہ ہوتے ویرانے

بڑھا گئے ہیں اجالوں کی زندگی کتنی

سیاہ رات میں جل جل کے آج پروانے

غم زمانہ غم زندگی غم جاناں

یہ ہیں کلیمؔ مرے میکدے کے پیمانے