na ahl-e-dil se na ahl-e-nazar se milta hai

na ahl-e-dil se na ahl-e-nazar se miltā hai

shu.ūr-e-zāt faqat apne dar se miltā hai

tumhāre faiz se khilte haiñ zindagī meñ gulāb

junūñ ko rang tumhārī nazar se miltā hai

bikhar rahī haiñ ziyā.eñ nikhar rahī hai fazā

tumhārā husn jamāl-e-sahar se miltā hai

faroġh-e-shauq hai yā irtiqā-e-jazb-e-darūñ

patā ab apnā tumhārī ḳhabar se miltā hai

vahī hai hāsil-e-ishrat vahī vaqār-e-hayāt

sukūn-e-dil jo ġham-e-mo'tabar se miltā hai

kahāñ phir izn-e-safar mil ga.ī agar manzil

safar kā zauq faqat rahguzar se miltā hai

vo kam-suḳhan haiñ magar ham se be-niyāz nahīñ

surāġh-e-dil suḳhan-e-muḳhtasar se miltā hai

nisār us pe do-ālam ke mai-kade 'parvez'

vo ek jaam jo un kī nazar se miltā hai

na ahl-e-dil se na ahl-e-nazar se milta hai

shuur-e-zat faqat apne dar se milta hai

tumhaare faiz se khilte hain zindagi mein gulab

junun ko rang tumhaari nazar se milta hai

bikhar rahi hain ziyaen nikhar rahi hai faza

tumhaara husn jamal-e-sahar se milta hai

farogh-e-shauq hai ya irtiqa-e-jazb-e-darun

pata ab apna tumhaari KHabar se milta hai

wahi hai hasil-e-ishrat wahi waqar-e-hayat

sukun-e-dil jo gham-e-mo'tabar se milta hai

kahan phir izn-e-safar mil gai agar manzil

safar ka zauq faqat rahguzar se milta hai

wo kam-suKHan hain magar hum se be-niyaz nahin

suragh-e-dil suKHan-e-muKHtasar se milta hai

nisar us pe do-alam ke mai-kade 'parwez'

wo ek jam jo un ki nazar se milta hai