na ai dil surat-e-shaiKH-e-haram diwana ban jaana

na ai dil sūrat-e-shaiḳh-e-haram dīvāna ban jaanā

kahīñ aanā na jaanā zā.er-e-but-ḳhāna ban jaanā

tumhārī dīda-e-maḳhmūr ko ye ḳhuub aatā hai

kabhī shīsha kabhī sāġhar kabhī paimāna ban jaanā

ajab aalam hai mad-hosh kā terī josh-e-mastī meñ

kabhī dīvāna ban jaanā kabhī mastāna ban jaanā

dil-e-sozāñ dikhānā jalva husn-o-ishq donoñ kā

kahīñ sham-e-shabistāñ aur kahīñ parvāna ban jaanā

ye thī talqīn-e-sāqī vaqt-e-ruḳhsat apnī mastoñ ko

kahīñ dīvāna ban jaanā kahīñ farzāna ban jaanā

usī meñ kuchh mafar apnā nazar aayā hasīnoñ ko

ki jā kar der meñ chupke but-e-but-ḳhāna ban jaanā

karishme haiñ ye saare jalva-e-husn-e-haqīqī ke

kahīñ āshiq kahīñ andāz-e-māshūqāna ban jaanā

navā-e-rāz sāz-e-ishq be-ḳhud kyuuñ na kar Daale

ki har parde se aatī hai sadā dīvāna ban jaanā

yahī ibrat-sarā-e-dahr kā har roz naqsha hai

kahīñ kāshāna ho jaanā kahīñ vīrāna ban jaanā

ḳhabar kis ko thī yuuñ aalam meñ rusvā.ī mirī hogī

ki unvān-e-mohabbat ko bhī thā afsāna na ban jaanā

ye aalam beḳhūdī-e-ishq kā ai 'shauq' kyā kahiye

tasavvur meñ kisī ke aap se begāna ban jaanā

na ai dil surat-e-shaiKH-e-haram diwana ban jaana

kahin aana na jaana zaer-e-but-KHana ban jaana

tumhaari dida-e-maKHmur ko ye KHub aata hai

kabhi shisha kabhi saghar kabhi paimana ban jaana

ajab aalam hai mad-hosh ka teri josh-e-masti mein

kabhi diwana ban jaana kabhi mastana ban jaana

dil-e-sozan dikhana jalwa husn-o-ishq donon ka

kahin sham-e-shabistan aur kahin parwana ban jaana

ye thi talqin-e-saqi waqt-e-ruKHsat apni maston ko

kahin diwana ban jaana kahin farzana ban jaana

usi mein kuchh mafar apna nazar aaya hasinon ko

ki ja kar der mein chupke but-e-but-KHana ban jaana

karishme hain ye sare jalwa-e-husn-e-haqiqi ke

kahin aashiq kahin andaz-e-mashuqana ban jaana

nawa-e-raaz saz-e-ishq be-KHud kyun na kar Dale

ki har parde se aati hai sada diwana ban jaana

yahi ibrat-sara-e-dahr ka har roz naqsha hai

kahin kashana ho jaana kahin virana ban jaana

KHabar kis ko thi yun aalam mein ruswai meri hogi

ki unwan-e-mohabbat ko bhi tha afsana na ban jaana

ye aalam beKHudi-e-ishq ka ai 'shauq' kya kahiye

tasawwur mein kisi ke aap se begana ban jaana