na apne bas mein hai rona na hae hans dena

na apne bas meñ hai ronā na haa.e hañs denā

koī rulā.e to ronā hañsā.e hañs denā

vo bātoñ bātoñ meñ bhar aanā apnī āñkhoñ kā

vo us kā dekh ke sūrat ko haa.e hañs denā

kisī ke zulm haiñ kuchh aise be-mahal ham par

ki jī meñ aatā hai rone kī jaa.e hañs denā

vo ḳhud hañsā.e to kam-baḳht dil zidīle dil

ye vaz.a-dārī hai kyuuñ haa.e haa.e hañs denā

udūl-e-hukmī-e-dard-e-jigar ki ab ai chashm

jo laakh baar vo uTh kar rulā.e hañs denā

koī jo tujh pe hañse barq-pāsh ālam-soz

to phir har ek pe tū bhuul jaa.e hañs denā

vo ham se pūchhte haiñ tum hamāre āshiq ho

javāb kyā hai ab us ke sivā.e hañs denā

safī' kahāñ kī shikāyat kahāñ kā ġham-ġhussa

kisī kā ain laḌā.ī meñ haa.e hañs denā

na apne bas mein hai rona na hae hans dena

koi rulae to rona hansae hans dena

wo baaton baaton mein bhar aana apni aankhon ka

wo us ka dekh ke surat ko hae hans dena

kisi ke zulm hain kuchh aise be-mahal hum par

ki ji mein aata hai rone ki jae hans dena

wo KHud hansae to kam-baKHt dil zidile dil

ye waza-dari hai kyun hae hae hans dena

udul-e-hukmi-e-dard-e-jigar ki ab ai chashm

jo lakh bar wo uTh kar rulae hans dena

koi jo tujh pe hanse barq-pash aalam-soz

to phir har ek pe tu bhul jae hans dena

wo hum se puchhte hain tum hamare aashiq ho

jawab kya hai ab us ke siwae hans dena

safi' kahan ki shikayat kahan ka gham-ghussa

kisi ka ain laDai mein hae hans dena