na bahar hi lage hai dil na ghar jaane ko ji chahe

na bāhar hī lage hai dil na ghar jaane ko jī chāhe

samajh meñ kuchh nahīñ aatā kidhar jaane ko jī chāhe

baḌī hangāma-parvar haiñ mirī tanhā.iyāñ yuuñ to

kisī kī anjuman meñ bhī magar jaane ko jī chāhe

salīb-o-dār kī rāheñ ye bastī aur ye vīrāne

batā zauq-e-junūñ terā kidhar jaane ko jī chāhe

milānā muskurā kar apnī nazreñ un kī nazroñ se

jab ai shīrāza-e-hastī bikhar jaane ko jī chāhe

bhaTaktā phir rahā huuñ dar-ba-dar din ke ujāloñ meñ

añdhere shaam ke bikhreñ to ghar jaane ko jī chāhe

pa-e-tafrīh jaane kis taraf vo ruḳh kareñ apnā

ujāloñ kī tarah har-sū bikhar jaane ko jī chāhe

ye duniyā jabki ranj-o-dard se māmūr hai 'nādim'

magar phir bhī yahāñ apnā Thahar jaane ko jī chāhe

na bahar hi lage hai dil na ghar jaane ko ji chahe

samajh mein kuchh nahin aata kidhar jaane ko ji chahe

baDi hangama-parwar hain meri tanhaiyan yun to

kisi ki anjuman mein bhi magar jaane ko ji chahe

salib-o-dar ki rahen ye basti aur ye virane

bata zauq-e-junun tera kidhar jaane ko ji chahe

milana muskura kar apni nazren un ki nazron se

jab ai shiraaza-e-hasti bikhar jaane ko ji chahe

bhaTakta phir raha hun dar-ba-dar din ke ujalon mein

andhere sham ke bikhren to ghar jaane ko ji chahe

pa-e-tafrih jaane kis taraf wo ruKH karen apna

ujalon ki tarah har-su bikhar jaane ko ji chahe

ye duniya jabki ranj-o-dard se mamur hai 'nadim'

magar phir bhi yahan apna Thahar jaane ko ji chahe