نہ باتیں کیں نہ تسکیں دی نہ پہلو میں ذرا ٹھہرے

نہ باتیں کیں نہ تسکیں دی نہ پہلو میں ذرا ٹھہرے

جو تم آئے تو کیا آئے جو تم ٹھہرے تو کیا ٹھہرے

کسی کا رنگ الفت کیا جمے واں یہ بھی مشکل ہے

کہ ان کے دست و پا میں ایک دم رنگ حنا ٹھہرے

دل مضطر بشکل برق دم لینے نہیں دیتا

مجھے آرام آ جائے جو پہلو میں ذرا ٹھہرے

وفاداری ہوئی بے کار مرنا کھیل آ ٹھہرا

خدا جانے کہ اب کیا رنگ آئین وفا ٹھہرے

دماغ ایسا ہی کچھ نازک جلیں ایسے ہی کچھ بد گو

کہوں اک حرف مطلب اور واں اک ماجرا ٹھہرے

چمن میں آگ سی پیراہن گل سے بھڑک اٹھی

فغاں سے ایک دم تو بلبل آتش نوا ٹھہرے

اگر جانا ہی ٹھہرا ہے تو اچھا دل بھی لے جاؤ

کسی پہلو کسی صورت تو جان مبتلا ٹھہرے

کبھی شادی کبھی غم ہے کبھی کچھ اور عالم ہے

دل اک مہماں سرا ہے اس میں رونقؔ کوئی آ ٹھہرے