na baaten kin na taskin di na pahlu mein zara Thahre

na bāteñ kiiñ na taskīñ dī na pahlū meñ zarā Thahre

jo tum aa.e to kyā aa.e jo tum Thahre to kyā Thahre

kisī kā rañg-e-ulfat kyā jame vaañ ye bhī mushkil hai

ki un ke dast o pā meñ ek dam rañg-e-hinā Thahre

dil-e-muztar ba-shakl-e-barq dam lene nahīñ detā

mujhe ārām aa jaa.e jo pahlū meñ zarā Thahre

vafādārī huī be-kār marnā khel aa Thahrā

ḳhudā jaane ki ab kyā rang-e-ā.īn-e-vafā Thahre

dimāġh aisā hī kuchh nāzuk jaleñ aise hī kuchh bad-go

kahūñ ik harf-e-matlab aur vaañ ik mājrā Thahre

chaman meñ aag sī pairāhan-e-gul se bhaḌak uTThī

fuġhāñ se ek dam to bulbul-e-ātish-navā Thahre

agar jaanā hī Thahrā hai to achchhā dil bhī le jaao

kisī pahlū kisī sūrat to jān-e-mubtalā Thahre

kabhī shādī kabhī ġham hai kabhī kuchh aur 'ālam hai

dil ik mehmāñ-sarā hai is meñ 'raunaq' koī aa Thahre

na baaten kin na taskin di na pahlu mein zara Thahre

jo tum aae to kya aae jo tum Thahre to kya Thahre

kisi ka rang-e-ulfat kya jame wan ye bhi mushkil hai

ki un ke dast o pa mein ek dam rang-e-hina Thahre

dil-e-muztar ba-shakl-e-barq dam lene nahin deta

mujhe aaram aa jae jo pahlu mein zara Thahre

wafadari hui be-kar marna khel aa Thahra

KHuda jaane ki ab kya rang-e-ain-e-wafa Thahre

dimagh aisa hi kuchh nazuk jalen aise hi kuchh bad-go

kahun ek harf-e-matlab aur wan ek majra Thahre

chaman mein aag si pairahan-e-gul se bhaDak uTThi

fughan se ek dam to bulbul-e-atish-nawa Thahre

agar jaana hi Thahra hai to achchha dil bhi le jao

kisi pahlu kisi surat to jaan-e-mubtala Thahre

kabhi shadi kabhi gham hai kabhi kuchh aur 'alam hai

dil ek mehman-sara hai is mein 'raunaq' koi aa Thahre