na bach paunga main ki biwiyan donon taraf se hain

na bach pā.ūñgā maiñ ki bīviyāñ donoñ taraf se haiñ

mire sar par barastī jūtiyāñ donoñ taraf se haiñ

milī hai chor se police milā ġhunDoñ se har netā

azal se in meñ sājhe-dāriyāñ donoñ taraf se haiñ

na laḌke ko pasañd laḌkī na laḌkī ko pasañd laḌkā

magar shādī kī sab tayyāriyāñ donoñ taraf se haiñ

damā kī vo marīza hai mujhe khāñsī ne gherā hai

buḌhāpe meñ baḌī majbūriyāñ donoñ taraf se haiñ

vo ho sasurāl yā maika ye kahtī hai bahū mujh se

mere kāñdhe pe zimmedāriyāñ donoñ taraf se haiñ

minister hoñ ki chaprāsī vo achchhā ho nahīñ saktā

ki public ke liye makkāriyāñ donoñ taraf se haiñ

tarannum hī kuchh aisā thā bichāra kyā kare 'vāhid'

ki hullaḌ aur na.are bāziyāñ donoñ taraf se haiñ

na bach paunga main ki biwiyan donon taraf se hain

mere sar par barasti jutiyan donon taraf se hain

mili hai chor se police mila ghunDon se har neta

azal se in mein sajhe-dariyan donon taraf se hain

na laDke ko pasand laDki na laDki ko pasand laDka

magar shadi ki sab tayyariyan donon taraf se hain

dama ki wo mariza hai mujhe khansi ne ghera hai

buDhape mein baDi majburiyan donon taraf se hain

wo ho sasural ya maika ye kahti hai bahu mujh se

mere kandhe pe zimmedariyan donon taraf se hain

minister hon ki chaprasi wo achchha ho nahin sakta

ki public ke liye makkariyan donon taraf se hain

tarannum hi kuchh aisa tha bichaara kya kare 'wahid'

ki hullaD aur nare baziyan donon taraf se hain