na bastiyon ko aziz rakkhen na hum bayaban se lau lagaen

na bastiyoñ ko aziiz rakkheñ na ham bayābāñ se lau lagā.eñ

mile jo āvārgī kī fursat to saarī duniyā meñ ḳhaak uḌā.eñ

ho ek gulshan ḳhizāñ-rasīda to kaam aa.e lahū hamārā

tamām aalam meñ tīrgī hai kahāñ kahāñ mish.aleñ jalā.eñ

agarche ye dil-fareb rasta bhī ḳhār-zāroñ kī anjuman hai

magar mirā jī ye chāhtā hai ki aable ḳhud hī phuuT jaa.eñ

jahāñ kī rañgīniyoñ kī hamrāz aañkh patthar banī huī hai

ye haal ab ho gayā hai dil kā na ro sakeñ ham na muskurā.eñ

ye dasht be-rah-ravoñ kī bastī ye shahr zindāniyoñ kā maskan

agarche ḳhalvat-nashīñ nahīñ ham magar kahāñ anjuman sajā.eñ

shagufta kaliyoñ kī dil kī dhaḌkan udaas lamhoñ meñ so ga.ī hai

sukūt vo chhā gayā ki har-sū bahār kartī hai saa.eñ saa.eñ

agarche 'shahzād' vo nigāheñ bhī ek muddat se muntazir haiñ

magar jo ḳhud se chhupā rahe haiñ vo zaḳhm unheñ kis tarah dikhā.eñ

na bastiyon ko aziz rakkhen na hum bayaban se lau lagaen

mile jo aawargi ki fursat to sari duniya mein KHak uDaen

ho ek gulshan KHizan-rasida to kaam aae lahu hamara

tamam aalam mein tirgi hai kahan kahan mishalen jalaen

agarche ye dil-fareb rasta bhi KHar-zaron ki anjuman hai

magar mera ji ye chahta hai ki aable KHud hi phuT jaen

jahan ki ranginiyon ki hamraaz aankh patthar bani hui hai

ye haal ab ho gaya hai dil ka na ro saken hum na muskuraen

ye dasht be-rah-rawon ki basti ye shahr zindaniyon ka maskan

agarche KHalwat-nashin nahin hum magar kahan anjuman sajaen

shagufta kaliyon ki dil ki dhaDkan udas lamhon mein so gai hai

sukut wo chha gaya ki har-su bahaar karti hai saen saen

agarche 'shahzad' wo nigahen bhi ek muddat se muntazir hain

magar jo KHud se chhupa rahe hain wo zaKHm unhen kis tarah dikhaen