na bulwaya na aae roz wada kar ke din kaTe

na bulvāyā na aa.e roz va.ada kar ke din kaaTe

baḌe vo ho ki tum ne achchhā achchhā kar ke din kaaTe

akele kyā tumhīñ ne saḳhtiyāñ jhelīñ judā.ī kī

nahīñ ham ne bhī patthar kā kalejā kar ke din kaaTe

batā mujh ko tarīqa ai shab-e-ġham saal kaTne kā

koī baara mahīne tiis din kyā kar ke din kaaTe

jise apnā samajhte the vahī dil ho gayā un kā

koī duniyā meñ ab kis kā bharosā kar ke din kaaTe

qazā bhī aa ga.ī lekin na aanā thā na aa.e vo

ye maiñ ne umr-bhar kis kī tamannā kar ke din kaaTe

tumhārā kyā khule bandoñ rahe chāhe jise dekhā

kamāl us ne kiyā 'muztar' ki pardā kar ke din kaaTe

na bulwaya na aae roz wada kar ke din kaTe

baDe wo ho ki tum ne achchha achchha kar ke din kaTe

akele kya tumhin ne saKHtiyan jhelin judai ki

nahin hum ne bhi patthar ka kaleja kar ke din kaTe

bata mujh ko tariqa ai shab-e-gham sal kaTne ka

koi bara mahine tis din kya kar ke din kaTe

jise apna samajhte the wahi dil ho gaya un ka

koi duniya mein ab kis ka bharosa kar ke din kaTe

qaza bhi aa gai lekin na aana tha na aae wo

ye main ne umr-bhar kis ki tamanna kar ke din kaTe

tumhaara kya khule bandon rahe chahe jise dekha

kamal us ne kiya 'muztar' ki parda kar ke din kaTe