نہ چھیڑ ان کا فسانہ اے دل ناشاد رہنے دے

نہ چھیڑ ان کا فسانہ اے دل ناشاد رہنے دے

میں برباد تمنا ہوں مجھے برباد رہنے دے

ندامت ہو انہیں شاید کبھی اپنی جفاؤں پر

ابھی شکوہ طرازی اے لب فریاد رہنے دے

مٹا دے صفحۂ دل سے مرے سب کچھ غم ہستی

مگر تا زندگی قائم کسی کی یاد رہنے دے

عجب لذت خلش میں اس کی ہے اے چارہ گر پنہاں

دل ایذا طلب میں ناوک بیداد رہنے دے

اگر ان کی طلب ہے پختہ کار آرزو ہو جا

ہوس کی خامکاری اے دل ناشاد رہنے دے

مبارک ہو تجھے اے بے وفا آرائش گیسو

جو برباد تمنا ہے اسے برباد رہنے دے

گر انبار کرم ہونے کی طاقت ہی نہیں اس میں

ولیؔ کو آشنائے لذت بیداد رہنے دے